Eid Mubarak

தனிமனிதன், குடும்பம், சமூகம் என்ற வகையில் சுய கட்டுப்பாட்டுடனும் இறையுணர்வுடனும் வாழ்வதற்கான பயிற்சியையும் அல்லாஹ்வுடனான நெருக்கத்தையும் ரமழான் எங்களுக்குப் பெற்றுத் தந்தது.

அல்லாஹ்வின் கட்டளையை நிறைவேற்றும் வகையில் பசியையும் தாகத்தையும் பொறுமையோடு ஏற்றுக்கொண்டு, அவனது அன்பையும் திருப்தியையும் எதிர்பார்த்து புலன்களை அடக்கி இரவும் பகலும் இறை வணக்கத்தில் ஈடுபாடு கொள்ளும் ஒரு சிறப்பான ஆன்மீகப் பயற்சியையும் ரமழான் வழங்கியது.

ஏழைகளின் பசியை அனுபவித்து உணர்ந்து வாழ்வின் அனைத்து சந்தர்ப்பங்களிலும் அவர்களுக்கு உதவ வேண்டும் என்ற மனித நேய மனப்பாங்கையும் இம்மாதம் எமக்கு வழங்கியது.

அப்படியிருக்க எமது நாடு பொருளாதார ரீதியாக நலிவடைந்த நிலையிலும் கொந்தளிப்பான அரசியல் சூழலிலும் சிக்கியிருப்பதை நாம் நன்கறிவோம்.

பொருட்களின் விலையுயர்வு, அத்தியாவசியப் பொருட்களுக்கான தட்டுப்பாடு, வெளிநாட்டுச் செலாவணிப் பற்றாக்குறை, வெளிநாட்டுக் கடன்களை செலுத்த இயலாமை போன்ற பல நெருக்கடிகளால் சர்வதேச, பிராந்திய மட்டத்தில் பல் கட்டுமான அழுத்தத்தில் நமது நாடு அல்லல் படும்வேளை இது.

நாட்டில் புறையோடிப்போயிருக்கும் ஊழலும் அநீதியும் வகுப்பு வாதம் போன்றவைதான் இந்த இழி நிலைக்கு காரணமென பக்கச் சார்பற்ற இளைஞர்கள், மற்றும் புத்திஜீவிகள் புத்தாக்க அரசியல் கலாசாரத்தை வேண்டி தொடர் மக்கள் போராட்டத்தில் ஈடுபட்டு வருகின்றனர்.

மக்கள் அனைவரும் பல இன்னல்களை சந்தித்து வரும் இவ்வேளையில் ஈகைத் திருநாளைக் கொண்டாடும் நாம் தேவையுடையவர்களுக்கு உதவி செய்வதிலும் நாட்டின் சுபீட்சத்திற்காக இறைவனிடம் பிரார்த்திப்பதிலும் அதிகம் ஈடுபடக் கடமைப்பட்டுள்ளோம்.

நடைபெறும் போராட்டம் நாட்டுக்கும் சமூகத்துக்கும் நல்ல பயனை வழங்க வேண்டும் எனவும் பிரார்த்திப்போம்.

மேலும் வாழ்வில் சிக்கனத்தை கடைபிடித்து, மிகை நுகர்வை குறைத்துக் கொள்ளவும் முடியுமானளவு பயிர்ச்செய்கை மற்றும் உற்பத்திப் பணிகளில் ஈடுபடவும் நாம் தீர்மானிக்க வேண்டும்.

அனைவருக்கும் இறையருள் கிடைக்கும் ஒரு ஈகைத் திருநாளாக இந்த ஈதுல் பித்ர் பெருநாள் அமைய வோண்டும் என எல்லாம் வல்ல இறைவனைப் பிரார்த்திக்கிறேன்.

அனைவருக்கும் ஈதுல் பித்ர் வாழ்த்துக்கள் உரித்தாகுக.

—

தலைவர்,

இலங்கை ஜமாஅத்தே இஸ்லாமி